Rev 21 | KYG | STEP | Agovana saufa koku'na'e saufa mopa'e'mo hane'nige'na age'nove. Hogote koku'na'e hogote mopa'e'mo alagi u'ana lageso hisa'ategamo hane'na'ageno solovala ani'mo hano hu'niye.

Revelation of John 21

Yoni'a saufa koku'na'e saufa mopa'e'mo age'niya gemae

1 Agovana saufa koku'na'e saufa mopa'e'mo hane'nige'na age'nove. Hogote koku'na'e hogote mopa'e'mo alagi u'ana lageso hisa'ategamo hane'na'ageno solovala ani'mo hano hu'niye. 2 Agovana aote taonimo saufa Yulusalemu taonimo Gotitegati'mo koku'napati'mo emine'nige'na age'nove. Ani taonimo'mo mago saufa a'mafa'nemo vele'mo maisiyafe'mo hau'nigeno alagepa kukena'e alagepa konali ya'a'e'mo alino vaiteno mai'niya a'mafa'negana huno hane'niye. 3 Yagaino ne'apateya vekamo sia'aleti'mo alopa gefati'mo ge huno'ae'mo, Ageyo, Goti'a hemenimo ma mopafi vaya'e'mo magokepi lokaeno maigiye. Agaemo apakae'e'mo magokepi lokaeno maisige'apae'mo vaya'amo maigae. Goti'a agai'amo apakae'e'mo magokepi lokaeno mai'neno Goti'apimo'mo maigiye. 4 Agaemo apaulagafati'mo muki apaunumo alagi alino laneno atalegaiye. Muki vaya'amo halate mago'e hu'a ofalige mago'e hu'a yulagefa o'aige mago'e hu'a avi'ya'mo osuge mago'e huno apakafu okige hute'a maigae. Muki kava'amo atafa kava'mogeno ago alagi hano hu'niye, huno hu'nige'na afi'nove.

5 Inagi yagaino ne'apateya siate'mo fai mai'niya vekamo'mo, Hemenimo muki ya'amo saufa ya'age'mo alo nehuve. Ani gemo lama gemo apakesa afi'a fatago hisaya agufa gemo hane'niya'mofe'mo avo'mo kao, huno naha pai'niye. 6 Naha paiteno mago'e gemo huno'ae'mo, ani gemo alagi huno hano hu'niye. Nagaemo ali'na aepa fai male'novanage'na ali'na hano hu'na atesuva vekamo mai'nove. Hogote'na mai'novanage'na hemeni'e'mo ne'mauvanage'na henaga'a'e'mo alagike'mo maiguve. Anife'mo hapau'nisiya vaya'mogimo miya ofaigafa meti ani'mo afa'a maisaya ya'mo alino ne'apamiya ani'mo afa'a fiku hefi'na apamiguve. 7 Ae'a ne'apakasaya vaya'mogimo muki ya'mo alisage'na Goti'apimo'na maisuge'apae'mo mafa'ne'nimo maigae. 8 Maigaya'monanafa vaya'aife'mo koli hute'a Goti ge'amo ne'atalaya vayanagi apakesa afi'a fatago nosaya vayanagi alagi faipa vayanagi vaya'mo ne'apamagiya vayanagi kumai kava'mo nehaya vayanagi Satani himamu'aleti'mo no'agaya agufa aune kava'mo nehaya vayanagi aigofe goti'apimogife'mo mono nehaya vayanagi muki agufa aigofe gemo nehaya vaya'mogi hu'a ata kotupi'mo sofa yafapi'mo neleya ata kotupi'mo maigae. Ata kotupi'mo maisaya kava'mo agi'amo napa tu afina'mo falisaya kavane.

Saufa Yulusalemu taonimo age'niya gemae

9 Mago enisole vekamo'mo seveni'a yuvapafati'mo henaga'amo apamagi'niya kayo'mo havai te'niya yuvapamo ali'naya enisole vayapati'mo mago enisole vekamo'a eno'ae'mo, Sipisipi vekale'mo maisiya a kanomo ali'na kave liguvanagi eno, huno naha pai'niye. 10 Goti Aunemepi'mo naune kava'mo hu'na mai'nogeno navalelino yatala avefi'mo haino nate'nige'na mai'nogeno aote Yulusalemu taonimo Gotitegati'mo koku'napati'mo emi'ne'nigeno alino nave li'niye. 11 Ani taonifati'mo Goti ha le konali ya'amo aeno ha le'niyana mago alopa monileti'mo miya nefaiya yafa'mo agi'amo yasipamo'a aeno lata late nehiya yafakana huno alino alave alave hu'niye. 12 Lusi yatala yafa lafi kegi'yamo hane'nigeno tuolofu'a lafi kate kitamo hane'nigeno tuolofu'a enisole vaya'mogimo lafi kate kitale'mo yagai'a mai'nae. Lafi kegi'ya kate kitale'mo tuolofu'a Isaleli nofi vaya'ai apaki'apimo avo'mo kae male'nigeno hane'niye. 13 Lole'e mago'e lafi kegi'ya kate kitamo yegemo haine ne'eya kotegamo hanege lole'e mago'e lafi kegi'ya kate kitamo yegemo lamino nefaleya kotegamo hanege lole'e mago'e lafi kegi'ya kate kitamo ma aupilaga hanege lole'e mago'e lafi kitamo muga aupilaga hanege huno hane'niye. 14 Yafa kegi'yamo faino ate'niya yafa'mo tuolofu'a yafa'mo hane'nigeno ani yafate'mo sipisipimo vekamo tuolofu'a apa vaya'amogi apaki'apimo avo'mo kae male'nigeno hane'niye.

15 Ani naha pai'niya enisole vekamo'a goli yafa kanipa kayoteti'mo taonifinagi lafi kegi'ya kate kitalenagi kegi'yalenagi huno maleno agege agege hisiya kayo'mo ali'niye. 16 Ani taonimo kesigana huno hane'nigeno aluga aluga atupa'amo'mo hailami salami osuno magoke aiyaya huno hane'niye. Agaemo kanipa kayoteti'mo maleno agege agege hu'nigeno yatala'amo tu tauseni fo hataleti'a kilomita hane'nigeno ani kava huno aluga aluga atupa'amo hane'nigeno ani kava huno anaga'a'e'mo hane'niye. 17 Agaemo kanipa kayoteti'mo maleno agege agege hu'nigeno yafa kegi'yamo tu hataleti'a agufa ya'mo vaya'mogi apaiyamo yatala'agana huno hane'niye. 18 Kegi'ya yafa'mo agi'amo yasipae huno hane'nigeno taoni'amo goli yafa'mo aeno lata late nehiya goli yafateti'mo alo hu'niye. 19 Yafa kegi'yamo faino ate'niya yafate'mo lusi miyateti'mo miya nefaiya konali yafa'mo malete malete huno male'niye. Napa vanimo faino ate'niya yafa'mo agi'amo yasipaleti'mo faino ateteno napa tumo faino ate'niya yafa'mo agi'amo sapaiyaleti'mo faino ateteno napa talimo faino ate'niya yafa'mo agi'amo agetileti'mo faino ateteno napa fomo faino ate'niya yafa'mo agi'amo emalolileti'mo faino ate'niye. 20 Napa faefumo faino ate'niya yafa'mo agi'amo satonikisileti'mo faino ateteno napa sigisimo faino ate'niya yafa'mo agi'amo koniliyanileti'mo faino ateteno napa sevenimo faino ate'niya yafa'mo agi'amo kalisolaitileti'mo faino ateteno napa eitimo faino ate'niya yafa'mo agi'amo pelileti'mo faino ateteno napa naenimo faino ate'niya yafa'mo agi'amo topasileti'mo faino ateteno napa tenimo faino ate'niya yafa'mo agi'amo kalisopesileti'mo faino ateteno napa levenimo faino ate'niya yafa'mo agi'amo haiyasinileti'mo faino ateteno napa tuolofumo faino ate'niya yafa'mo agi'amo ametisileti'mo faino ate'niye. 21 Tuolofu'a lafi kegi'ya kate kitale'mo tuolofu'a sesumo lusi miyateti'mo miya nefaiya agufa sesumo hane'niye. Magoke sesuleti'mo vaino vego hu malefa sesu yafateti'mo magoke lafi kegi'ya kate kitamo alo hu'niye. Taonifi kate'mo goli yafatetike'mo alo hu male'nigeno aeno lata late nehiya yafakana huno hane'niye.

22 Ala kava ne'mo Goti'a muki lokiya'age veka'e aikeli sipisipi veka'e'mo aote taonifi mono nokana hu'ana mai'na'a'mofe'mo mono no'mo o'age'nove. 23 Goti'a ha le konali ya'amo'mo aeno ha le'nigeno aikeli sipisipimo'a lamugana huno aeno ha neleya'mofe'mo yegemo'e kaimo'e'mo ae'ana ha lesa'a ali'ya'animo alagi ohane'niye. 24 Taonimo'a aeno ha nelege'apae'mo alu kotega alu kotegamo mai'naya vaya'mogimo aeno ha neleya yate'mo umenitata hugae. Ma mopafi vaya'aite'mo yagai'a ne'apataya kini vaya'mogimo taonifi'mo konali ya'apimo alini'a egae. 25 Muki afina'mo alagi hani osugiya'mofe'mo lafi kegi'ya kate kitamo alagi yaki maleno maiteno magoke afina'mo kitamo alagi okigiye. 26 Alu kotega alu kotegamo mai'naya vaya'ai konali ya'api'e kagemi ya'api'e'mo alini hai'a taonifi'mo malegae. 27 O'ani'ya fai'nisiya ya'mo ani taonifi'mo ohanegaiye. Apavagage hisiya kava'mo nehaya vaya'mofi aigofe gemo nehaya vaya'mofi hu'a ohaigaya'monanafa afa'a maisaya ya'mo ali'nisaya vaya'ai apaki'apimo mukufi'mo avo'mo kae male'niya vaya'age'mo haigae.